Cc'à nta ‘sta terra !….
(Dedicata all’amico Maurizio Abramo)
(Catanzaro 22-12-1997)
Cc'à nta sta terra !….
Cc'à, nta sta terra vogghiu tornara,
Stu sula stu mara on pozzu scordara,
Cca nta sta terra vogghiu tornara.
Ammenzu a la timpa a ficara e l'olivara,
Si godunu nzema scurrira a fhjumara,
E sutta stu sula << cerasu de mara >>,
Vicinu a chist'occhi na varca passava.
Sentivi a cicala i canzuni cantara,
I griddhi crì crì mi fannu sbegghiara,
‘U trenu ciuf ciuf chi va verzu u mara ,
Ccà nta sta terra vogghiu tornara.
Ccà nta sta terra nd'ha fici sonati,
Mparavi guagliuni cchi chitarri scordati,
Sonava nte vichi cantava rirìa,
Cca tutta a genta mi canuscìa.
Cca nta sta terra nd'ha fici sonati,
Chitarri, mandoli cchi pruppetti e patati,
U tempu passava cchi ffù Gatanè,
Ccà sta sta terra signora Tirè.
U sula cocìa u ventu hiuhhiava,
E de luntanu na varca passava,
Ccà si sentìa l'addura do mara,
U calura de ggenti cchi sozizza nostrala…
U sula cocìa u ventu hiuhhiava,
Ccà c'era a festa, on mi fara penzara,
Nta tutti i paisi guardandu e luntanu:
Chi botti ppa festa ! u cielu brillava.
-E subbra ‘u barcuna chist'occhj a guardara,
I canniti ingialliti a ficundianara,
E sutta sti timpi cchi vannu a calara,
Ccu fhiuri a la cima ‘u mara vasara.
Ccà nta sta terra vogghiu tornara ,
Stu sula ‘stu mara on pozzu scordara,
Ccà nta sta terra on pozzu tornara.
Giallurussu Catanzaru !….
(Ai tifosi Ultras Catanzaresi dedico)
(Milano 4-9-2003)
Festijaru a Catanzaru !
Giallurussu ‘u ventijaru
Ccu banderi a tutta l’ura
Para a fhesta d’o Signura.
Mò nci vò << cchí allegria!>>
A chjazza balla, cu’ ciangìa !
Fhiocchi gialli, nastri russi,
Festijaru <<quantu gutti!>>
San Mbitalianu protettura,
Ti pregamma do matinu,
Ma sapimu ogne simana,
‘Stu verdettu ccussì finu.
Finarmenta ‘na nchjianata!
In C1,<< cci volia !…>>
Passa tempu s’apra a strata,
Ma ti pigghj a megghju vija.
T’u cangiàsti a vista d’occhju,
A na beddha squatra << èfhesta >>
Mò tu cacci ‘u pettu ‘e fora
Taccu e punta tira ‘e testa.
<< Cci volìa cci volìa !.>>
Si dicìa a ’na potica,
Cca cc’è fhesta ddhà cc’è vita;
Meritamma << benadica !.>>
Quantu genti nt’a si strati !..
Ccu banderi trumbi << e jiati!…>>
Cc’è ccu sona c’è ccu scatta
Cc’è ccu grida e cu’ s’icazza.
<< Cci volìa, cci volìa !.>>
Catanzaru è culurata,
Bancareddhi, mustazzoli
Na pipita <<a cchjù stonata!>>
L‘emigrati su‘ cuntenti,
’Ncunu penza, ciàngia e cora,
Ca ’sta vota Catanzaru
Pìgghja palla, pìgghja gloria.
Forza forza Catanzaru !
T’i pigghjasti u culuritu !
Giallu russu t’i ‘nchjmasti
Pezzu pezzu pp’o vestitu.
Si nda parra si nda parra,
Nord sud ‘e ‘sta nchjanata,
Ca surgìu Catanzaru,
Mara, munti,tutta a squatra.
Tanti cosi furu fatti,
Su cuntentu d’o Comuna
E stu sindacu cchi sana,
U malannu , ogne puntuna.
T’i conzàu capu, pedi,
E vò bbena <<’ u cittadinu!>>,
E s’umilia s’iddhu u sapa,
Senza sordu e nu destinu.
Festijaru ‘u Catanzaru, !
Tutti arretu na maglietta,
Puru sordi cu non ava,
E fujiu, non aspetta.
U morzeddhu, u cora amicu,
I tri ( V ) !.. <<i barzamamu !…>>
E poeti sì nd’avimu
E ccu verzi ti lodamu.
E non mancunu tenori !
Ccu chitarra e mandulinu
Ma ni cantanu ccu cora
Seria A, scudettu u primu !
Giallurussu Catanzaru !
U morzeddhu, bbonu vinu
Viva a squatra, u pallona
E ‘u tifu cittadinu.
Giallu ‘u sula,
Russu ‘u focu,
( Fora gabbu )
<< E W u jiocu ! >>.
Forza ultràaaa………….
Forza Catanzaru.
Mi ricordu e 'on mi scordu
Mi ricordu tempu arretu,
Quand'on jia a lavorara,
Eru conzatu comu a San Petru,
Cca varva longa para para.
Mi ricordu i scarpi rutti,
I cammisi arrepezzati,
Ogne tantu a panza chjna ,
E pumadori assulicchiati.
Mi ricordu e non mi scordu,
Ch'eru orfanu e malatu,
Puru u Sindacu 'u sapìa,
Ch'eru puru disperatu.
Mi ricordu i fhjuri beddhi,
L acqua d'o mara chiara, chiara,
I vichj stritti, stritti, stritti;
Cchi on potivi caminara.
Mi ricordu e non mi scordu,ù
E na perzuna tantu cara,
Iddha sì comu na mamma
T accugghìa senza parrara.
E quando ncuna vota
Eu ppe casu cci passava,
A casa tutta iddha aprìa
Perzinu a tavula e mangia.
Ma on è ca vogghiu dira,
Ca iddha è tuttu bonu stara,
Puru iddha tira a vita,
Puru iddha tira a campara.
Mi ricordu e non mi scordu
E cu' fa bbena e non fa mala,
Cutureri anticu, vecchju, bbonu,
Iddhu tampra u misala.
Taccumpagna i canzuni,
Ccu catarra e mandulinu,
Ccu l'attiosi on va d'accordu,
Ma va bbonu ccu 'u vinu;
Sona bbonu sona cuntentu
Oramai sta vita ava e passara,
A gugghja l'usa comu strumentu,
Ma tira avanti ma po campara.
Mi ricordu e on mi scordu ,
Quando bussau a la portu mia,
Nu guagliuna cc'u patra ,
Ma cci sonu l'Ave Maria;
Iddhu è picculu ma è tantu randa,
Iddhu no sapa, iddhu on ci arriva,
Iddhu mi deza a forza ma campu ,
Iddhu mi deza a forza cchju viva:
Jia e venìa quand’ era malatu,
Cchi piatti a li mani, ccu mangiara conzatu.
No ficia nessunu de parenti cari,
M'o ficia u guagliona ccu cora all' otari.
Mi ricordu e on mi scordu,
D'e panni amprati da casa mia,
D'e rosi russi supra u barcuna,
D'o maccatura jiancu da mamma mia.
’U conzàru, Catanzaru !…
Dedico questo scritto alla cara
memoria di Don Antonio Abramo
’U conzàru Catanzaru !…
Tutti ’i petri cc’ i ’ncoddhàru,
Vichi vichi, a una a una,
Cc’i cacciàru :<< ’u mangiasuna !>>
Mò nci vò << cchí fetunzìa ! >>
’Sta pulizzìa cu s’a cridìa !?
’Sta vota l’acconzàru,
’I grubbi cc’ i ’mbuddhàru !…
– San Mbitalianu protettura,
Puru ’a varva cc’ i facisti ?
Tutta l’erva cc’ i tagghjasti,
Cc’ i scupasti ‘sti mundizzi ?
Cc’ i facisti ’a vita nova,
Cc’ i ligasti ’u mantisinu,
Tutti ’i jiorni ’u bibbarò,
Cci ’u mpucisti d’o matinu.
E cc’ i voza ’sta cangiàta !…
’E si tempi cu‘ s’a cridìa !
Finarmenta ha‘ ’nu patra
Cchi vvò bbena sulu a ttia.
T’u cangiàsti a vvista d’occhju,
’A ’na beddha parmanenta !..
Mò tu cacci l’occhj ’e fora,
T’i guardasti? Chissu è nnenta !..
– << Cci volìa cci volìa !.>>
Si dicìa a ’na putica,
Cca cc’è festa ddhà cc’è vita;
’U cconzàru << benedica !.>>
– Quantu ggenti nt’a si strati !..
Du‘ palumbi << ’on ’ i scantati !.
Sgruscia l’acqua d’a funtana
’Ncuna ’mbiva, s’alluntana.
<< Cci volìa, cci volìa !.>>
Tutti ’ i chjani su‘ addobbati,
’Ncuna chjazza manca ancora,
<<Chiddha ’e Stoccu ppe‘ favora !>>
Cala ’u sula sutta ’i casi,
<< Mah ’sti ggenti ’e dua nesciru !?>>
Guàaa !. ’sta luna spacca ’u cielu,
Cca cc’è festa ppe‘ daveru.
– Tempu arretu, << cchí ruvina !.>>
’Ncunu tortu vinna fattu,
’U teatru << ’u San Carlino >>
Strati, chjesi << cchí mispattu !.>>
– ’U ’mbracaru Catanzaru !..
Cc’ i cangiàru ’u pannolinu,
Tutta ’a terra arrivotàru,
Ma ci cangiunu ’u destinu.
L‘emigrati su‘ cuntenti,
’Ncunu penza, ciàngia ancora,
Ca ’sta vota Catanzaru
Pìgghja pacia, pìgghja onora.
– Ma cc’è ’ncunu ’on para veru !..
C’hava ’a lingua sempa longa,
E ’u tàgghja cc’ a lamànza,
<<Ah ! ppecchí cci crìscia ’a panza !?>>
Ppe’ favora ’on ’a finìti ?..
Càngia ’u tempu, cchí sapiti !?
’Ncunu voza nt’a ’sa storia,
Ma rispetta ’na memoria.
È d’o patra ’e Sergiu Abramu,
’E Donn’ Antoni n’omu caru,
Cchí vidìa Catanzaru
’U fhjura beddhu, ’u fhjura raru.
– Poca gargia ’on v’a sentiti,..
Tanti cosi vu‘ viditi,
Mò, n’i tocca ma guardamu ;
<< ’U conzàru Catanzaru !..>>.
Milano 3-04-2002